မနေ့က (Dear Yesterday)

မနေ့က ... ညဦးပိုင်း သိပ်မချမ်းတော့လို့ စောင်အပါးခြုံအိပ်နေတာ မနက်ကျ ချမ်းလာလို့ ဂွမ်းစောင်မထူမပါး ခေါက်လျှက်ကို တင်ပြီး အိပ်မိပါတယ်... မိန်းမက တစ်ရေးနိုးတော့ စောင်ပိနေတယ်မှတ်လို့တဲ့ ရုတ်တရက် လှမ်းဆွဲချလိုက်တော့ လန့်နိုးတာ ပြန်အိပ် လို့ကို မရတော့ဘူး... သူ့ညီမ တစ်ဝမ်းကွဲ မင်္ဂလာဆောင်ရှိတာနဲ့ အိပ်ယာ ထလိုက်ရတယ်... အိပ်ယာ ထထချင်း ရေချိုးခန်းနဲ့ အိမ်သာ မအားသေးတာနဲ့ တီဗွီဖွင့်ကြည့်ဖြစ်တယ်... အိမ်သာအားတော့ အီးပါ မျက်နှာသစ် ရေချိုး အ၀တ်အစားလဲပြီး မင်္ဂလာဆောင်ကို ချီတက်ကြတယ်...
၁၀ နာရီလောက်မှာ သမီးကို အိမ်ထောင်စု ဇယားထဲ ထည့်ဖို့ လ၀ကရုံးကို သွားကြတယ်... ၁၀-နာရီခွဲလောက်ရောက်တယ်... ဦးစီးမှူး မရောက်လာသေးလို့ စောင့်ရတယ်... ဦးစီးမှူးရောက်ပြန်တော့လည်း အိမ်ထောင်စု ဇယားမှာ သမီး နာမည် တစ်ကြောင်းတိုးဖို့ တော်တော်ကြာကြာလေး ရေးရတယ်... ရေးပြီးတော့လည်း ဦးစီးမှူး လက်မှတ် ပြန်ထိုးရပြန်တယ်... လက်မှတ်ထိုးရတာလည်း တော်တော် ကြာတယ်... လက်ဖက်ရည်ဖိုးလေး ပေးပါဦးလို့ တိုးတိုးလေး တောင်းတယ်... တိုးတိုးပြောရင် ကျတော် နားမကောင်းတာလား မသိ... လက်ဖက်ရည်ဖိုးပဲ ကြားတာ... ဘယ်လောက်တောင်းမှန်း မသိဘူး... ခြင်္သေ့ကြီး ၄ ကောင် ထုတ်ပေးလိုက်တယ်... လက်ငါးခြောင်း ထောင်တော့ထောင်တယ်... ဆိုင် - မဆိုင်တော့ မသိဘူး... ၄ကောင်နဲ့ပြီးသွားတယ်... အကောင် ၅၀ မဟုတ်လို့ တော်သေးတယ်... ညနေ ၂း၃၀ နာရီမှ အဲဒီရုံးကနေ ပြန်လာဖြစ်တယ်... လ၀က ရုံးက ၀န်းထမ်းတွေရဲ့ လက်စွဲ စကားက "ခဏ ထိုင်ပါဦး" တဲ့... ထိုင်စရာနေရာလည်း လုံလုံလောက်လောက်မရှိဘဲ ထိုင်ခိုင်းတယ်...
ရုံးမှာ "တံစိုးလက်ဆောင်ပေးရန်မလို" တော့ရေးထားတယ်... "တံစိုးလက်ဆောင်ပေးရန် - မလို" ဒီလို အဓိပ္ပာယ်လား... "တံစိုးလက်ဆောင်ပေး - ရန်မလို" ဒီလို အဓိပ္ပာယ်လားတော့ မသိဘူး...
အဲဒါ မနေ့က...

မနေ့က ကျတော့်ဖုန်းကို ပထမဦးဆုံး နိုင်ငံခြား အခေါ် လက်ခံရရှိတယ်... ထိုင်း နိုင်ငံက ဆက်တာပါ... ဆိုင်ကယ်စီးနေတုန်း ကိုင်မယ်လုပ်တော့ voice mail ထဲဝင်သွားတယ်... "ဟဲလို ကိုလှ ကြားလား ကြားလား" ဆိုတဲ့ စကားသံပဲ ကြားရတယ်... ဘယ်သူလဲမသိ... ကျတော့်ဖုန်း နံပါတ်ကို ဘယ်လို သိတာလဲ မသိ... ဘာများ ပြောချင်၊ မေးချင်တာလည်း မသိ... ဒီနေ့ ထိုင်းရောက်နေတဲ့ သူငယ်ချင်းကို လှမ်းဆက် ခိုင်းတော့ ဖုန်း မကိုင်ဘူးတဲ့...
My labels: Mandalay News, Dear Yesterday, မန်းလေး, မန္တလေး, မနေ့က